આધ્યાત્મિક સૂત્રો

'જ્ઞાની પુરુષ'નો એક અક્ષર જ જો સમજમાં આવ્યો તો કલ્યાણ જ થઈ જાય!

હારીને પછી જીતેલાને આશીર્વાદ આપે તે મોક્ષે જાય, 'કમ્પલીટ' થાય!

આપણે છૂટવું હોય તો આપણે હરીફાઈમાં ના રહીએ. હરીફાઈમાં હોઈએ ત્યાં સુધી સામો એના દોષ સંતાડે ને આપણે આપણા!

બુદ્ધિ એ આજની કમાણી છે, આજનો 'એક્સપિરિયન્સ' છે! જ્યારે અક્કલ એ કુદરતી બક્ષિસ છે!

વિપરીત બુદ્ધિ થવી એ તો આ કાળનો વિચિત્ર નિયમ જ થઈ પડ્યો છે ને! અને એમાં ચેતીને ચાલે છે તે જીત્યો.

'અનડિસાઈડેડ' (અનિર્ણિત) વિચારો, એનું નામ મન. 'ડિસાઈડેડ' (નિર્ણિત) વિચારો, એનું નામ બુદ્ધિ.

આપણા લોકો તાવ જાય છે, તેને તાવ આવ્યો કહે છે! જે તાવ મહીં ભરાઈ રહ્યો હતો, જે વિકારી ખોરાકનું પરિણામ છે તેને 'વાઈટાલિટી પાવર' ગરમી ઉત્પન્ન કરીને શુદ્ધતા લાવે છે.

જલેબી ચાનું તેજ હણે. તેવી જ રીતે આત્માનું જ્યારે સુખ ચાખે, ત્યાર પછી આ સંસારનાં સુખો મોળાં લાગે. સંસારનાં સુખો મોળાં લાગે નહીં ત્યાં સુધી સંસાર છૂટે નહીં!

જીવનનાં બે પ્રકારે ધ્યેય નક્કી થાય છે: 'જ્ઞાની પુરુષ' આપણને મળે નહીં તો સંસારમાં એવી રીતે જીવવું કે આપણે કોઈને દુઃખદાયી ના થઈ પડીએ. આપણા થકી કોઈનેય કિંચિત્‌માત્ર દુઃખ ના થાય એ મોટામાં મોટો ધ્યેય હોવો જોઈએ અને બીજામાં તો પ્રત્યક્ષ 'જ્ઞાની પુરુષ' મળી જાય તો તેમના સત્સંગમાં રહેવું, તેનાથી તો તમારાં દરેક કામ થાય. 'પઝલ' 'સોલ્વ' થઈ જાય બધાં.

મન હેરાન નથી કરતું, રાગ-દ્વેષ હેરાન કરે છે. રાગ-દ્વેષને લીધે સ્મૃતિ છે!

'પોતે' પોતાને જાણતો નથી, એ જ મોટામાં મોટી માયા. અજ્ઞાન ખસ્યું કે માયા વેગળી!

વસ્તુ કે આંખો માયા નથી, પણ ઇન્દ્રિયોનું જે ખેંચાણ થાય છે તે માયા છે!