કુંડલિની ચક્ર એટલે શું? કુંડલિની જાગરણ વખતે શું થાય છે?
કુંડલિની શું છે?
પ્રશ્નકર્તા: 'કુંડલિની' જગાડે ત્યારે પ્રકાશ દેખાય એ શું છે?
દાદાશ્રી: એ પ્રકાશને જોનાર શુદ્ધાત્મા, એ પ્રકાશ જોડે તન્મયાકાર થઈ જાય તે પ્રતિષ્ઠિત આત્મા. એમાં બે-ચાર કલાક તન્મયાકાર રહે તેથી આનંદ રહે, પણ પછી એની ગેરહાજરી થાય એટલે હતા ત્યાં ના ત્યાં. કેવા રંગનો પ્રકાશ દેખાય છે?
પ્રશ્નકર્તા: કોઈ દિવસ ના દેખ્યો હોય એવો સફેદ હોય છે.
દાદાશ્રી: જેમાં તન્મયાકાર થયો તેમાં આનંદ થાય. બહારવટિયાની ચોપડી વાંચે તોય આનંદ થાય, પણ એનાથી કર્મ ખોટા બંધાય. જ્યારે આ એકાગ્રતાથી સારા કર્મ બંધાય. આ કુંડલિની જાગ્રત કરે છે તે કરતા આત્માને કંઈક જગાડ ને! આ તો માત્ર કુંડલિનીના જ સ્ટેશન ઉપર ફર ફર કરે છે. આમને ગુરૂ મહારાજ કાળી ભોંય ઉપર વરસાદ પડે એવા સ્ટેશને ઉતારે એ શું કામનું? આપણને તો અહીં છેલ્લું સ્ટેશન મળી ગયું. અનંત પ્રકારના સ્ટેશનો છે, એમાં ગુરૂ ક્યાંય ગૂંચવી મૂકે. છતાં એનાથી સ્થિરતા રહે; પણ મોક્ષ માટે એ શું કામનું?
કુંડલિની જાગ્રત કરે પણ એનાથી દ્રશ્ય દેખાય, પણ એ તો હતું જ ને પહેલેથી! દ્રષ્ટિ દ્રષ્ટામાં પડે અને જ્ઞાન જ્ઞાતામાં પડે તો જ નિર્વિકલ્પ થાય!
પ્રશ્નકર્તા: દાદા, મને કુંડલિનીનું લાઈટ ઊભું થઈ જાય છે.
દાદાશ્રી: એકાગ્રતાનું સાધન છે તેથી લાઈટ ઊભું થાય ને આનંદ આવે. લોકો એ લાઈટને આત્મા માને છે, પણ લાઈટ એ આત્મા નથી; એ લાઈટને, જે જુએ છે તે આત્મા છે. આ લાઈટ એ તો દ્રશ્ય છે અને એનો જોનારો, દ્રષ્ટા તે આત્મા છે. તમને અહીં જે યથાર્થ આત્મા આપ્યો છે તે આ લાઈટનો દ્રષ્ટા છે!
પ્રશ્નકર્તા: આ એકાગ્રતા કરે તેથી લાઈટ જેવું દેખાય ને તેથી આનંદ આવે!
દાદાશ્રી: પણ એ આનંદ બધો રીલેટિવ આનંદ, એ કોના જેવું? બરફી ખાય ને આનંદ આવે તેવું. છતાં આ સારું છે. આ સંસારની પાર વગરની બળતરામાં તે કંઈક સાધન તો ઠંડક માટે જોઈએ ને? અને જ્યાં સુધી સાચો માર્ગ ના મળ્યો હોય ત્યાં સુધી એ બરોબર છે.
subscribe your email for our latest news and events
દાદા ભગવાન ફાઉન્ડેશન, અડાલજ એ આધ્યાત્મિક નોન-પ્રોફિટ ઓર્ગેનાઈઝેશન છે જેનો હેતુ અક્રમ વિજ્ઞાનના આધ્યાત્મિક વિજ્ઞાન દ્વારા આખા જગતમાં સુખ-શાંતિ અને એકતા ફેલાવવાનો છે.
તમારા પ્રશ્નનો અચૂક જવાબ મેળવો
