શું ભગવાનનું અસ્તિત્વ છે? ભગવાન ક્યાં છે?
શું ભગવાનનું અસ્તિત્વ છે? શું ભગવાન છે? આ વિશાળ બ્રહ્માંડમાં ભગવાન ક્યાં રહે છે?
શું તેઓ સ્વર્ગમાં છે? શું તેઓ આકાશમાં છે? મંદિરમાં છે? આપણા હદયમાં છે? કે પછી કોઈ બીજી જગ્યાએ છે?
ભગવાનનું સાચું સરનામું નહીં જાણવાથી, આપણે તેમની કલ્પના અહીંયા ને ત્યાં બધે જ કર્યા કરીએ છીએ.
ભગવાન ક્યાં છે?
“ગોડ ઈઝ ઈન એવરી ક્રીએચર, વેધર વિઝિબલ ઓર ઈન્વિઝિબલ. ગોડ ઈઝ ઈન ક્રીએચર, નોટ ઈન ક્રિએશન.”
ભગવાન દરેક જીવમાત્રમાં છે, પછી તે આંખે દેખાય એવા કે ન દેખાય એવા હોય, તમારી ને મારી વચ્ચે દૂરબીનથીય ન જોઈ શકાય એવા અનંત જીવો છે; એ દરેકની મહીં ભગવાન બેઠા છે! જો કે, આ સોફા, ટેબલ, કેમેરા, ટ્યૂબ લાઈટ કે રેકોર્ડર પ્લેયરમાં નથી કારણ કે, આ બધા મેન મેઈડ ક્રિએશન છે. મનુષ્યોએ બનાવેલી વસ્તુ હોય તેમાં, ભગવાન નથી, પરંતુ કુદરતી બનાવટ છે, એમાં ભગવાન છે. એટલે એકેન્દ્રિય, બે ઈન્દ્રિય, ઝાડ-પાન, પશું-પક્ષી, મનુષ્યો બધામાં. આપણને જે બહારથી દેખાય છે તે દેહ છે અને એની મહીં ભગવાન રહેલા છે!
શું ભગવાનનું અસ્તિત્વ છે?
હા છે.
જ્યાં પણ ભગવાનની હાજરી હોય ત્યાં વૃદ્ધિ થાય અને ત્યાં લાગણીઓ હોય.
ભગવાન શક્તિ સ્વરૂપે દરેક જીવમાત્રની મહીં રહેલા છે અને આ શક્તિની હાજરીમાં દરેક જીવ વૃદ્ધિ પામે છે. દાખલા તરીકે, જો આપણે અનાજને ભીના કપડાંમાં રાખીએ તો ઊગી નિકળશે ને? પણ, જો આપણે પથરાંને ભીના કપડામાં વર્ષો સુધી રાખીએ તો શું એ ઊગશે? નહીં. જે વસ્તુમાં ભગવાન નથી, તે ઊગી નહીં શકે કે પછી લાગણી પણ અનુભવી નહીં શકે.
ભગવાનનું અસ્તિત્વ છે તે આપણે કેવી રીતે જાણી શકીએ?
જો ભગવાનનું અસ્તિત્વ નથી તો પછી, આ જગતમાં સુખ કે દુઃખનો અનુભવ થઈ શકે નહીં. માત્ર ભગવાનની હાજરીમાં જ આપણે લાગણીઓ અનુભવી શકીએ છીએ. દાખલા તરીકે, જો આપણે કીડીને પકડવા જઈએ, તો તે આપણાથી ડરીને નાસી જાય છે અને હકીકતમાં આપણે તેને અડીએ તે પહેલા જ દોડવા માંડે છે. કારણ કે, એને આપણી હાજરી અને આપણા આશયની ખબર પડી જાય છે. તેથી કીડીમાં ભગવાન રહેલા છે. જ્યારે આપણે ટેબલ પકડી અને તેને તોડી નાખીએ તો ટેબલ ભાગી નહીં જાય. કારણ કે, તે જીવતું નથી અને તેને કોઈ પણ લાગણીઓ અનુભવાતી નથી. તેથી ટેબલમાં ભગવાન નથી.
જ્યાં પણ આપણે વૃદ્ધિ કે લાગણીઓ જોઈએ છીએ, ત્યાં જાણવું કે મહીં ભગવાન રહેલા છે. વૃદ્ધિ અને લાગણીઓ ભગવાનની હાજરીનો સૌપ્રથમ અને સરળ પુરાવો છે. નિર્જીવ વસ્તુઓમાં ભગવાન નથી અને તેથી જ તેઓ વૃદ્ધિ નથી પામતા કે લાગણીનો અનુભવ નથી કરી શકતા.
તો હવે આપણે જાણીએ છીએ કે દરેક જીવમાત્રની મહીં ભગવાન છે, તો હવે આપણે તેમને કેવી રીતે જોઈ શકીએ?
આપણે આખી જિંદગી, ભગવાનને બહાર ખોળવા મથીએ છીએ, પણ ખરેખર ભગવાનનો મહીં (આંતરિક) જ અનુભવ થવો જોઈએ.
આપણી નારી આંખે (ચર્મચક્ષુથી), આપણને બહાર માત્ર ટેમ્પરરી અને વિનાશી (ક્ષણિક) વસ્તુઓ જ દેખાય છે.
ભગવાનને કોઈ દેહ નથી. દેહ તો માત્ર બાહ્ય આવરણ (બહારનું પેકિંગ) છે. તે પેકિંગ તો આંબાના ઝાડનું કે ગધેડાનું, મનુષ્યનું કે બીજા કોઈ પણ જીવનું હોઈ શકે અને તે તો એક દિવસ સડી જાય કે ફાટી જાય. જ્યારે ભગવાન તો અવિનાશી શુદ્ધ તત્ત્વરૂપે મહીં બિરાજેલા છે, તે દરેકમાં સમાન ભાવે રહેલા છે. આ શાશ્વત તત્ત્વ એ આપણી ખરી ઓળખાણ છે! આ મહીંરહેલું તત્ત્વ એ જ પોતે છે. પોતે જ શુદ્ધાત્મા છે. શુદ્ધાત્મા એ ભગવાન છે!
દરેકની મહીં રહેલા શાશ્વત (અવિનાશી) ભગવાનને માત્ર દિવ્યચક્ષુથી જ જોઈ શકાય, કે જે પ્રત્યક્ષ જ્ઞાનીની કૃપા દ્વારા જ્ઞાનવિધિમાં આત્મજ્ઞાન પ્રાપ્તિ સમયે જ પ્રાપ્ત થાય છે. આત્મજ્ઞાન પછી, આપણે દરેક જીવમાત્ર, આપણી પોતાની, બીજા મનુષ્યોની મહીં, આપણી આજુબાજુ રહેલા આ ઝાડ કે પછી પશુની મહીં પણ ભગવાન જોઈ શકીએ છીએ. ભગવાન ત્યાં જ છે! એ જ ભગવાનનું એડ્રેસ છે!
subscribe your email for our latest news and events
દાદા ભગવાન ફાઉન્ડેશન, અડાલજ એ આધ્યાત્મિક નોન-પ્રોફિટ ઓર્ગેનાઈઝેશન છે જેનો હેતુ અક્રમ વિજ્ઞાનના આધ્યાત્મિક વિજ્ઞાન દ્વારા આખા જગતમાં સુખ-શાંતિ અને એકતા ફેલાવવાનો છે.
તમારા પ્રશ્નનો અચૂક જવાબ મેળવો
